Megjithëse qeveria ka vendosur një izolim total përgjatë fundjavës me synim parandalimin e koronavirusit ka nga ata që e shkelin hapur këtë rregull, madje mu në mes të kryeqytetit.
Gjatë një koncerti të improvizuar nga këngëtarja Eneida Tarifa në zonën midis Astirit dhe Yzberishtit, shihen qytetarë që janë grumbulluar në tarracat e pallateve pa pasur as më të voglin shqetësim se mund të infektohen apo të infektojnë të tjerë me koronavirus.
Në videon e siguruar nga Fjala.al, shihen qytetarë të ndryshëm në rrugë duke nisur që nga fëmijët e deri tek më të rriturit, ndërsa në dy blloqet e pallateve përballë njëri-tjetrit njerëzit kanë mbushur tarracat duke e kthyer në një grumbullim masiv.
Kjo është shumë e rrezikshme në një kohë që kërkohet distancimi social prej gati 2 metra, një udhëzim ky i Organizatës Botërore të Shëndetësisë në mënyrë që të frenohen infektimet nga koronavirusi.
E gjithë kjo ngjarje ka ndodhur në fundjavë, kur izolimi është total, por mesa duket qytetarët i kanë keqkuptuar lehtësimet e masave kufizuese të njoftuar nga kryeministri Rama, duke bërë që të mbushin rrugët dhe tarracat e pallateve./Fjala.al/
