Suedia është një nga vendet e cila nuk ka marrë masa të ashpra ndaj koronavirusit. Deri më tani në Suedi, kafet janë të hapura, restorantet, supermarketet për të mos folur më pas për qendrat tregtare të cilat funksionojnë sikur të mos kishte ndodhur asgjë.
Megjithatë, tubimet publike me mbi 50 persona janë ndaluar, po ashtu vizitat në spital dhe në azile, ndërsa mësimi në shkolla dhe fakultete po zhvillohet online. Shumë të tjerë punojnë nga shtëpia. Këto janë vetëm një pjesë e masave të vogla të cilat Suedia i mori pasi po rritej numri i të prekurve, i cili deri më tani ka shkuar në 14.500 persona ndërsa 1.570 tjerë kanë humbur jetën.
Megjithatë, ka nga ata ekspertë të cilët nuk pajtohen aspak me karatinimin dhe izolimin total të njerëzve në shtëpi.
Një nga ish-epidemiologët më në zë të Suedisë, Johan Gjesek, thekson se mbyllja e qytetarëve nëpër shtëpitë e tyre është një ide shumë e keqe, shkruan Real Clear Politics. 
“Karantinimi dhe mbyllja e shteteve evropiane nuk janë masa të mbështetura në fakte shkencore. Mendoj se politika e duhur do të ishte mbrojtja e të moshuarve dhe personave që vuajnë nga sëmundjet tjera kronike, ndërsa të tjerët do të duhej ta kishin parasysh se COVID-19 është një sëmundje e lehtë e ngjashme me gripin. Historia ka treguar se pastrimi i duarve dhe distanca sociale janë metodat më të mira në luftën e çfarëdo sëmundjeje. Sapo të kryhen testet masive të antitrupave, besoj se do të tregojmë se gjysma e popullatës në Suedi tashmë e kanë kaluar sëmundjen e COVID-19, dhe se përqindja e vdekjeve do të jetë rreth 0,1 për qind”, është shprehur Gjesek.
