Xherdan Shaqiri është duke kërkuar tashmë për një tjetër skuadër, pasi klubi i Liverpool nuk dëshiron që të rinovojë kontratën me futbollistin shqiptar.
Vëllai i Xherdanit njëkohësisht menaxher i tij, Erdin Shaqiri, ka thënë në një prononcim për “Koha TV” se qëllimi i lojtarit të Zvicrës është që të qëndrojë te skuadra e “Të Kuqve”.
“Unë nuk mund të them asgjë konkrete, por është normale që pasi të rifillojë dhe më pas të përfundojë ky edicion në Premier League, do të ulemi me drejtuesit e Liverpoolit dhe do të bisedojmë për të ardhmen e Xherdanit. Për të gjithmonë ka pasur interesim nga klube tjera. Ka pasur interesim konkret nga 2-3 klube edhe gjatë muajit janar, por besoj se edhe verës do të ketë oferta të shumta për të. Por, prioritet do të ketë Liverpooli me të cilin do të flasim për të ardhmen e Xherdanit”,- tha Erdin Shaqiri, vëllai dhe menaxheri i Xherdan Shaqirit.
Ndër skuadrat e interesuara për Xherdanin, kryesoret sipas të vëllait janë Roma, Sevilja, Gallatasarai dhe shumë klube angleze./Fjala.al/
