Triumfi i trajnerit Emanuel Egbo me skuadrën e Tiranës ka arritur deri në Gjermani. Ekipi i Tiranës ndodhet tashmë 9 pikë përpara Kukësit të vendit të dytë dhe ky rezultat u arrit në sajë të drejtimit të Egbos, i cili deri më tani nuk numëron asnjë humbje. Histori suksesi është cilësuar ajo e trajnerit nigerian me ekipin bardheblu nga një faqe gjermane në rrjetin social Facebook “Albanische Nationalmannschaft”.
“Egbo, njeriu i orës së Tiranës! Me Emanuel Egbo, një ikonë absolute e klubit të Tiranës pushtoi kryeqytetin”.-shkruhet në atë faqe.
Më tej bën një përmbledhje të shkurtër të karrierës së Egbos si portier: “Nigeriani luajti nga 2001 – 2004. Ai dha fund karrierës pas katër vitesh me Bylisin në verën e vitit 2012. Egbo ka mbajtur rolin e trajnerit të portierëve që nga 2015-ta dhe shpesh herë ka hyrë në skuadër si një trajner i përkohshëm të Bylis”,-thuhet në këtë artikull.
Ndërsa në fund e gjithë vëmendja përqendrohet te puna e 46-vjeçarit si trajner dhe suksesi me ekipin kryeqytetas të Shqipërisë, të cilin arriti ta merrte nga buza e “greminës” e ta nxirrte në krye të Superligës.
“Pas marrjes së rolit të trajnerit në dimër, Egbo fitoi 10 nga 11 ndeshje dhe deri më tani është i pamposhtur. E mori skuadrën në vendin e katërt duke e çuar në të parin si dhe mposhti Partizanin në derbi 5-1. Egbo është një qytetar i Shqipërisë dhe flet shqiptar mjaft mirë. Një histori suksesi”,-shkruhet në këtë artikull.
Rikujtojmë se Egbo është trajneri që arriti të sillte fitoren e derbit në shtëpinë bardheblu pas plot 5 vitesh me rezultatin 2-1 dhe më pas sërish mundi që të triumfonte në një fitore që s’mund të harrohet lehtë në stadiumin “Air Albania”, ku bardheblutë mundën të kuqtë e Partizanit me rezultatin e thellë 5-1./Fjala.al/ Katerina Tafa/
