Rritet bilanci i të infektuarëve me COVID 19 në Shqipëri. Nga 22 raste të reja 12 janë shënuar vetëm nërrethin e Kurbinit duke e kthyer atë në vatrën e re të përhapjes së virusit më shumë se 40 ditë pasi u shfaq për herë të parë në Tiranë.
Sëmundja ngjitëse Covid-19 vijon të përhapet në vendin tonë edhe pas 5 javësh që vendi ishte në izolim. Epiqendra e shpërndarjes është zhvendosur nga Tirana në dy qytete të vogla në Veri, Krujë dhe Laç. Vatra e re e të infektuarëve ka lidhje me biznesin e një fasonerie, e cila vazhdonte punën deri disa ditë më parë. Deri më tani në këto dy qytete numërohen 42 raste me koronavirus, ku 19 janë në Laç dhe 23 në Krujë.
Instituti i Shëndetit Publik njoftoi dje për 12 raste të reja me koronavirus në Laç dhe 5 në Krujë vetëm gjatë 24 orëve të fundit, ku pjesa dërrmuese e të prekurve, siç raportojnë mediat, janë pikërisht gra që kanë punuar në fasonerinë e Krujës. Pasi janë infektuar në fasoneri, punonjëset e kanë dërguar virusin në shtëpi duke ia ngjitur edhe familjarëve. Ministria e Shëndetësisë bëri të ditur se vijon hetimi epidemiologjik dhe gjurmimi i kontakteve në vatrën e Krujës.
Gjatë ditës së djeshme u konfirmuan dhe 22 raste të reja me koronavirus në vend duke e çuar në 584 numrin total të të prekurve. Shumica prej të prekurve raportohen të shëruar.
Po ashtu vjon përhapja në qytetin e Tiranës me 2raste të reja dhe në Shkodër ku janë shënuar 2 raste të tjera. Numri i të shëruarve sipas ministrisë ka vajtur në 327 duke vijuar të jetë më i lartë se numri i të infektuarve aktivë.
Në njoftimin zyrtar Ministria e Shëndetësisë theksoi se “gjatë 24 orëve të fundit, 13 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 327. Aktualisht në vendin tonë janë 231 persona të infektuar aktivë. Përqindja e të shëruarve është më e lartë krahasuar me të infektuarit aktivë dhe kjo tendencë tashmë vazhdon pa luhatje prej më shumë se një jave. Ju informojmë se, në shërbimin infektiv aktualisht janë 35 të shtruar. 5 pacientë janë në terapi intensive.” Në dy spitalet COVID aktualisht po marrin shërbim 44 pacientë, 9 prej të cilëve janë shtruar në spitalin COVID 2 “Shefqet Ndroqi”. Sipas ministrisë 5 pacientë janë në terapi intensive në gjendje të rënduar. Deri më tani betejën me këtë virus e kanë humbur 26 pacientë, ndërsa qytetet me më shumë raste janë Tirana dhe Shkodra.
Nuk ka më alarm
Ministria e Shëndetësisë beson se megjithëse virusi vijon të infektojë qytetarë të tjerë nuk ka vend për alarm për sa kohë situata është nën kontroll.
Mira Rakacolli zv/ministre tha se “pavarsisht luhatjesve në numrat ditorë të zbulimit të bartësve të virusit apo të sëmurëve prej tij, situata është njëlloj e kontrolluar.Treguesi i vërtetë është numri i të shtruarve në spitale, që vazhdon të mbetet në shifra të qëndrueshme”.
“Në mënyrë që situata të vazhdojë të jetë e kontrolluar, është e rëndësishme që qytetarët të respektojnë masat e distancimit fizik, si e vetmja mënyrë e kufizimit të përhapjes së infeksionit”, theksoi ajo.Këto masa duhet të respektohen makimalisht edhe brenda rretheve familjare, duke shmangur vizitat tek të afërmit për çdo lloj arsye./Fjala.al
