Kryebashkiaku i Tiranës, Erion Veliaj ka mbështetur dëshirën e kryeministrit Edi Rama që fundjava në Tiranë të jetë gjithnjë pa makina, njësoj siç po ndodh gjatë pandemisë së koronavirusit.
“Sa bukur do ishte sikur gjithnjë më pas të kishim fundjava pa makina fare dhe të mbanim mend, se për hir të gjyshërve e të fëmijëve së paku, jetohet edhe pa zhurma e pa bori të shtunave e të dielave, të paktën nga shtatori në prill kur s’ka nisur ende koha e plazhit”, shkruan Rama në rrjetet sociale teksa poston foto të nënave me fëmijët.
Kryebashkiaku Veliaj ka shpërndarë këto fjalë të kryeministrit dhe shkruan shkurtimisht: “Shumë dakord”.
Aktualisht nuk ka ndonjë nismë konkrete për pezullimin e lëvizjes së makinave gjatë fundjavave në kryeqytet, por duket se Rama dhe Veliaj po e hedhin hapin e parë.
Gjithsesi, në profilin e Veliajt në ‘Twitter’ nuk mungojnë komentet ku i kërkohet përmirësimi i transportit urban, si mënyra e vetme për të kufizuar qarkullimin e makinave.
