Kryeministri Edi Rama përmes një lidhjeje direkte në rrjetin e tij social, Facebook ka folur mbi situatën e vështirë të krijuar nga koronavirusi.
Rama i është përgjigjur interesit të shumë qytetarëve se kur do të nisë hapja dhe se kur njerëzit do të dalin nga shtëpitë apo nëse do të rihapen shkollat.
Kreu i qeverisë ka marrë si referencë vendet e tjera të Evropës sa i përket procesit të hapjes.
Ai theksoi se nga vendet evropiane dhe ato nordike, vetëm Danimarka ka vendosur që të rihapë shkollat.
Sipas tij, Shqipëria nuk mund ta ndërmarrë këtë hap pasi përbën rrezikshmëri aq më tepër kur edhe vendet e tjera të Evropës nuk dinë se çfarë do të bëjnë.
Për më tepër sipas Ramës, Shqipëria ka edhe një taksirat tjetër, siç është tërmeti, që ka shkaktuar dëme të mëdha në shkolla. Sipas kryeministrit ato përbëjnë një rrezik më vete.
“Përveç koronavirusit, ne kemi edhe një taksirat tjetër, kemi tërmetin, shkollat përbëjnë një rrezik, sidomos ato që janë dëmtuar nga tërmeti”
Kryeministri shpjegoi se hapja nuk mund të ndodhë në mënyrë të menjëhershme pasi edhe bota i trembet një vale të dytë të koronavirusit.
Ai shtoi “normaliteti ri nuk do të jetë njësoj para se të hynim në këtë situatë. Në normalitetin e ri do të duhet t’i imponojmë njëri-tjetrit kushte dhe rregullat që kemi mbajtur deri tani”.
