Në një video-konferencë që zhvilloi me 35 media të huaja, Albin Kurti ka bërë me dije se çfarë përmbante plani i shkëmbimit të territoreve midis Kosovës dhe Serbisë, për të cilin ai akuzon presidentin Hashim Thaçi.
Kryeministri tha se plani i është bërë me dije këshilltarit të tij nga një këshilltar i presidentit Thaçi.
Sipas Kurtit, tri komunat në veri, Leposaviqi, Zveçani e Zubin Potoku do i takonin Serbisë. Komuna e Preshevës do i bashkohej Kosovës, por vetëm qyteti, pa fshatrat që ndahen me hekurudhën, ngase ishte thënë se hekurudha i përket Kinës (pjesë e projektit gjigant ‘Rruga e Mëndafshit’).
Ndërkohë që liqeni i Ujmanit (Gazivodës), në veri të Kosovës, do të ishte nën kontrollin e NATO-s, Kisha Ortodokse Serbe do të kishte statusin e Vatikanit apo të Maunt Atos në Greqi, ndërsa Mitrovica e Veriut do t’i takonte Kosovës.
Albin Kurti ka kundërshtuar me forcë këtë plan, për të cilin thotë se tani nuk ekziston më, por ideja e shkëmbimit të territoreve nuk ka vdekur ende.
