Kryeministri në detyrë i Kosovës, Albin Kurti deklaroi se janë duke u ndryshuar rregullat e ‘lojës’, pasi në vitin 2014 Gjykata Kushtetuesi vendosi një aktgjykim ku thuhej se i pari në garë përbën shumicën relative, kjo gjë u kundërshtua asokohe nga partia e drejtuar nga Kurti, por e pranuan vendimin. Ndërsa tani sipas kryeministrit në detyrë, tashmë po bëhet e kundërta dhe po kërkohet që kthehen në 2014.
“Të shohim dokumentet zyrtare me tekst e nënshkrime poshtë. Pastaj do të japim vlerësimet tona.
Në vitin 2014 ne kemi konsideruar se shumica parlamentare krijohet në Kuvendin e Republikës, mirëpo pati një aktgjykim të Gjykatës Kushtetuese që e definoi shumicën si shumicë absolute dhe si shumicë relative, që i pari në garë përben shumicën relative. Ne ishim kritikë atëherë, por e kemi pranuar vendimin. Atëherë e akuzuan VV-në se nuk po e pranon të parin në garë. Në vitet në vijim, 2015 e tutje, ne patëm pranuar këtë aktgjykim. Dhe tash dolëm të parët në garë dhe po na thonë hajde të kthehemi në vitin 2014. Pra ndryshuan rregullat e lojës. Po na bëjnë padrejtësi të dyfishtë, edhe më 2014 edhe tani”,tha Kurti në konferencën e mbajtur para objektit të qeverisë.
Më tej Kurti shtoi se presidenti Thaçi është duke dalë jashtë kompetencave të tij dhe do të krijojë një qeveri e cila do të jetë e varur nga PAN-it dhe Lista Serbe.
“Presidenti me kalimin e kompetencave të tij po tenton të krijojë një vullnet politikë. Nga pavarësia, ne kishim një qeveri që nuk varej as prej PAN-it e as prej Listës serbe. Tash do të jetë e varur prej të dyjave. Pra nga një qeveri e pavarur në një me varësi të dyfishtë”./Fjala.al
