Operacioni “Divjaka”/ Arrestohen 4 persona, ndër ta një polic

Katër persona janë arrestuar nga bashkëpunimi i Policisë së Fierit me Prokurorinë e Lushnjes, duke u finalizuar kështu operacioni “Divjaka”

Në pranga kanë rënë shtetasi: A. Sh., 43 vjeç, banues në Divjakë; L. B., 53 vjeç, banues në Divjakë; H. M., 46 vjeç, banues në Tiranë; I. V., 38 vjeç, banues në Tiranë (me detyrë punonjës policie).

Personave në fjalë u janë sekuestruar lëndë narkotike dhe 3 armë gjahu si dhe 2 pajisje për prodhimin e fishekëve.

Njoftimi i policisë:

Fier

Finalizohet me sukses operacioni policor “Divjaka”.

Operacioni, nga strukturat e narkotikëve pranë DVP Fier, në bashkëpunim me Prokurorinë e Lushnjes.

Sekuestrohen lëndë narkotike dhe 3 armë gjahu.

Vihen në pranga 4 shtetas, njëri prej tyre punonjës policie.

Seksioni për Hetimin e Trafikut të Paligjshëm dhe Narkotikëve në DVP Fier, në bashkëpunim me Prokurorinë Pranë Gjykatë së Shkallës së Parë Lushnjë, pas informacioneve të marra në rrugë operative dhe me kryerjen e veprimeve të shpejta procedurale, nëpërmjet përdorimit të metodave speciale të hetimit, kanë bërë të mundur finalizimin e operacionit policor “Divjaka”, në përfundim të të cilit u arrestuan në flagrancë shtetasit:

1. Sh., 43 vjeç, banues në Divjakë;
2. B., 53 vjeç, banues në Divjakë;
3. M., 46 vjeç, banues në Tiranë;
4. V., 38 vjeç, banues në Tiranë (me detyrë punonjës policie).

Veprimet proceduriale për arrestimin e punonjësit të policisë u kryen nga specialistët e SHÇBA-së Fier.

Gjatë operacionit, në hyrje të qytetit të Divjakës, në lokalin e shtetasit L. B, u kapën në kushtet e flagrancës, me një sasi prej 34 gr. lëndë narkotike të dyshuar kokainë, e cila u sekuestrua në cilësinë e provës materiale.

Gjithashtu, nga kontrollet e banesave të tyre dhe më konkretisht në banesën e shtetasit A. Sh, në Divjakë, janë gjetur dhe sekuestruar në cilësinë e provës materiale 3 armë gjahu pa leje, 2 pajisje për prodhimin e fishekëve, si dhe një sasi baruti për prodhimin e fishekëve të gjuetisë.

Materialet procedurale i kaluan Prokurorisë pranë Gjykatës së Shkallës së Parë Lushnjë, në ngarkim të shtetasit A. Sh., për veprat penale “Prodhimi dhe shitja e narkotikëve” dhe “Prodhim dhe mbajtja pa leje të armëve të gjuetisë dhe sportive”, në ngarkim të shtetasit L. B., për veprat penale “Prodhimi dhe shitja e narkotikëve” dhe “Përshtatja e lokalit për përdorim droge” dhe në ngarkim të shtetasve H. M. dhe I. V., për veprën penale “Prodhimi dhe shitja e narkotikëve”./Fjala.al/