54,043 të infektuar dhe 3,704 të vdekur janë shifrat zyrtare të Ministrisë së Shëndetësisë në Brazil për pasojat që ka sjellë koronavirusi. Megjithatë, ekspertët vendas flasin për një shifër shumë herë më të lartë të infektimeve dhe vdekjeve.
Brazili po rrezikon të kthehet në vatrën e re të virusit në botë, ndërkohë që presidenti Jair Bolsonaro refuzon të marrë masa për izolimin e njerëzve, pasi nuk e konsideron virusin të një rrezikshmërie të lartë.
Por raportimet që vijnë nga shteti më i madh i Amerikës Latine janë tronditëse.
Autoritetet mjekësore në Rio de Janeiro dhe katër qytete të tjera të mëdha po paralajmërojnë se sistemi shëndetësor është pranë kolapsit. Spitalet nuk kanë më kapacitete për të pritur pacientë të rinj.
Në Manaus, qytetin më të madh të Amazonës, autoritetet janë detyruar të hapin varreza masive për shkak të numrit të lartë të vdekjeve.
E enjtja ishte dita më e keqe për Brazilin pasi u raportuan 3700 raste të reja infektimi dhe 400 vdekje.
Por shkenctarët në Universitetin e Sao Paulos dhe në Universitetin e Brazilias nuk i besojnë këto shifra. Ata kanë deklaruar se numri real i të infektuarve llogaritet të jetë nga 587,000 deri në 1.1 milion.
Shkenctarët thonë se numri prej 6700 testesh në ditë që po realizon qeveria është i vogël dhe nuk pasqyron situatën reale të infektimit me COVID-19 në Brazil.
