Më pak sfilata, më pak luks e shpenzime, më shumë kujdes dhe përgjegjësi, më shumë kreativitet. Mbretëresha e Vogue, Anna Wintour, ka folur për të ardhmen e modës pas Covid-19, në një intervistë live në youtube me modelen Naomi Campbell, “No filter with Naomi”.
E izoluar që në nga mesi i muajit mars në Long Island, Wintour ka saktësuar se pavarësisht vështirësi të mëdha dhe frikës nga pandemia, moda dhe e gjithë industria e fashionit, do tja dalë të mbijetojë dhe kjo mund të arrihet vetëm përmes reflektimit të këtyre ditëve: “Nuk mund të mendojmë më për mbrëmje gala, për evente luksoze por kjo është periudha për ta bërë më të vlefshëm artin tonë, ta festojmë artin që ne bëjmë e ta ndajmë me të tjerët” tha drejtuesja e revistës prestigjoze të modës “Vogue”.
Sipas Wintour, sistemi i sfilatave të modës, me javët e modës dy herë në vit, në Nju Jork, Londër, Paris e Milano apo me shfaqje të ndryshme përgjatë vitit, duhet ndryshuar. Duhet ndryshuar drejtim në cdo aspekt të kësaj industrie. Sipas saj, ky është momenti të rimendojmë për shpenzimet e tepërta e të kota, për paratë, për konsumin e kotë dhe luksin e tepruar./Fjala.al/
