Kryeministri Edi Rama i është përgjigjur akuzave të opozitës mbi zhvillimin e tenderave në mënyrë sekrete për të blerë pajisje mjekësore për të përballuar situatën e krijuar nga koronavirusi. Përmes një videoje në Facebook, të cilën e ka titulluar “MIRËMËNGJES nga unë, Luli dhe shokët e tij”, Rama hedh poshtë akuzat duke ironizuar opozitën.
“Çfarë sekreti ka këtu?! Nuk ka tendera sekretë, as kontrata sekrete. Procedurat e tenderimit të përdorura për COVID-19 janë procedura të miratuara ligjore, për lidhjen e kontratave që diktohen nga interesat thelbësore të shtetit. Po të ishin sekrete nuk do të ishin publike”, thotë Rama.
Në lidhje me akuzat e opozitës për blerjen e maskave me një shumë prej 6.5 euro, Rama shprehet se blerja e tyre është bërë me 4.14 euro.
“Me vërtet?! Maskat mbrojtëse FFP2 janë blerë me 4.14 euro”, shkruan Rama.
Edhe për veshjet mbrojtëse, kryeministri thotë se janë blerë shumë më poshtë se sa akuzon opozita.
Sa i përket akuzave për kompaninë fituese për blerjen e ushqimeve, Rama thotë se “kjo kompani është pjesë e një grupi të madh e të mirënjohur të shqiptarëve të Maqedonisë së Veriut që operon prej vitesh në fushën e tregtitë së ushqimeve. Kontrata u lidh jo për 1.5 mln euro por për vetëm 830 mijë euro”.
