Policia ka arrestuar 57-vjeçarin me probleme të shëndetit mendor i cili qëlloi ndaj policisë mbrëmjen e djeshme në qytetin e Skraparit.
57-vjeçari është identifikuar si Hekuran Hoxha dhe ai akuzohet për ‘armëmbajtje pa leje’ dhe prishje të qetësisë publike.
Si ndodhi ngjarja:
Ai ishte mbyllur prej 3 orësh në shtëpinë e tij dhe qëllonte me kallashnikov mbi uniformat blu që prej orës 20:40 të mbrëmjes së djeshme. Menjëherë pasi kanë marrë këtë informacion RENEA-a ka zbarkuar në Skrapar për t’u ardhur në ndihmë efektivëve të policisë.
Sipas njoftimit të policisë, efektivët kanë nisur të negociojnë me 57-vjeçarin që vuan nga probleme të shëndetit mendor, i cili ka qëlluar mbi policinë nga brenda banesës në lagjen “5 shtatori”. Por, vetëm pas shumë orësh ata kanë mundur ta neutralizojnë 57-vjeçarin, duke bërë të mundur edhe arrestimin e tij.
Njoftimi i Policisë:
Skrapar
Ndërhyrja e Reneas vë në pranga personin që qëlloi me armë në ajër dhe më pas Policinë.
Sekuestrohet arma e zjarrit kallashnikov dhe një sasi municioni luftarak.
Rreth orës 01:00 të datës 29.04.2020, forcat speciale “Renea” kanë vënë në pranga shtetasin H. H., 57 vjeç, banues në lagjen ”5 Shtatori”, Skrapar.
Ky shtetas, në orët e mbrëmjes së djeshme, në katin e parë të një pallati, ka qëlluar në ajër me armë zjarri dhe më pas kur ka parë shërbimet e Policisë ka qëlluar edhe në drejtim të tyre. Më vonë, ky shtetas u fut në banesë dhe nuk iu përgjigj thirrjeve të Policisë për t’u dorëzuar.
Shërbimet e Policisë morën masa sigurie dhe rrethuan pallatin. Në ndihmë të Policisë vendore shkuan shërbimet e Drejtorisë Vendore të Policisë Berat dhe më pas forcat speciale “Renea”.
Pas ndërhyrjes së forcave speciale “Renea” u bë e mundur vënia në pranga e 57-vjeçarit dhe u sekuestrua edhe arma kallashnikov, bashkë me një sasi municioni.
Materialet i kaluan Prokurorisë, për veprime të mëtejshme.
