Një 57-vjeçar me probleme të shëndetit mendor ka qëlluar mbi policinë mbrëmjen e djeshme në qytetin e Skraparit.
Ai ishte mbyllur prej 3 orësh në shtëpinë e tij dhe qëllonte me kallashnikov mbi uniformat blu.
Menjëherë pasi kanë marrë këtë informacion RENEA-a ka zbarkuar në Skrapar për t’u ardhur në ndihmë efektivëve të policisë.
Sipas njoftimit të policisë, efektivët kanë nisur të negociojnë me 57-vjeçarin që vuan nga probleme të shëndetit mendor, i cili ka qëlluar mbi policinë nga brenda banesës në lagjen “5 shtatori”.
Njoftimi i orës 23:57 i Policisë së Shtetit:
Skrapar/ Informacion paraprak
Rreth orës 20:40, në Skrapar, në lagjen”5 Shtatori”, në katin e parë të një pallati, shtetasi H. H., rreth 57 vjeç, me probleme të shëndetit mendor, ka qëlluar disa herë në ajër me armë zjarri.
Në vendngjarje shkuan menjëherë shërbimet e Policisë dhe shtetasi H. H., kur i ka parë punonjësit e Policisë, ka qëlluar në drejtim të tyre dhe është mbyllur në banesë.
Shërbimet e Policisë kanë marrë masa sigurie dhe kanë rrethuar pallatin, duke i bërë thirrje që të dorëzohet, por deri në këto momente ai nuk i është përgjigjur thirrjeve të Policisë.
Në ndihmë të Policisë vendore janë nisur forcat e Ndërhyrjes së Shpejtë të Fierit dhe një grup i negociatave të Reneas.
