Administrata e Donald Trump është duke formuluar një plan afatgjatë për të ndëshkuar Kinën mbi shpërthimin e pandemisë së koronavirusit.
Plani që po përgatit presidenti i Shteteve të Bashkuara të Amerikës mendohet ta godasë Kinën në shumë fronte.
Sipas administratës Trump, ndëshkimi i Kinës qoftë përmes faturave të majme apo sanksioneve, shkon përtej përfitimit elektoral në zgjedhjet që pritet të mbahen në nëntor.
Deri më tani koronavirusi ka vrarë më shumë se 60,000 amerikanë dhe për këtë Donald Trump fajëson Kinën.
Sipas burimeve brenda administratës së Trump, ekziston një oreks i madh i presidentit amerikan për të përdorur mjete të ndryshme, përfshirë sanksionet, anulimin e detyrimeve të borxhit të SHBA-së dhe hartimin e politikave të reja tregtare, për t’ia bërë të qartë Kinës dhe të gjithë të tjerëve, se dikush duhet të mbajë përgjegjësi.
“Ne duhet të rindërtojmë ekonominë, duhet të jemi të kujdesshëm se si e bëjmë këtë” tha një zyrtar i administratës, duke folur në kushte anonimati.
“Por ne do të gjejmë mënyra për t’i treguar kinezëve se veprimet e tyre janë plotësisht të qortueshme”.
Komuniteti i inteligjencës ndërkohë u vendos nën një presion nga administrata dhe nga zyrtarët e lartë që po kërkojnë të zbulojnë nëse virusi doli nga laboratori në Wuhan të Kinës apo erdhi nga natyra.
Nga ana e saj, inteligjenca amerikane deklaroi se virusi nuk është krijuar në laborator, por ka ardhur nga lakuriqët e natës.
Megjithatë, Donald Trump beson se ky është virus artificial i krijuar nga dora e Kinës për të cilën ai po përgatit edhe planin për ta ndëshkuar. /Përshtati nga CNN për Fjala.al, B.Quku/
LEXO EDHE:
“OBSH-së t’i vijë turp”/Donald Trump: Kam prova, koronavirusi është prodhuar në…
