Klubet e futbollit që do të rinisin të rikthehen në seancat stërvitore e më pas në ndeshjet zyrtare, do të duhet të bëjnë llogaritë me dëmtime të njëpasnjëshme, një situatë të pakontrolluar dhe me brishtësi fizike. Infermieritë do të mbushen plot.
Parashikimi aspak optimist vjen nga një ekip mjekësh i skuadrës së Barcelonës që pretendon se nga 5 deri në 10 futbollistë për secilën skuadër, do të vuajnë probleme fizike pasi të rinisin kampionatet e pezulluar nga pandemia. për shumë tifozë ky është parashikim i keq, por mjekët insistojnë se është një skenar optimist.
Klubet tani kanë shqetësim shëndetin e lojtarëve por jo vetëm nga Covid-19. “Letargjia” prej dy muajsh i ka ulur në rendimentin fizik dhe do të sjellë dhjetëra dëmtime. Vetëm në muajin e parë 5 deri 10 lojtarë të padisponueshëm për çdo ekip, e deri kur sezoni të mbarojë. Muskujt e kofshës konsiderohen pika nevralgjike ku duhet patur kujdes, pasi lojtarët janë stërvitur si mos më keq, dhe pa mbikëqyrjen e duhur.
Mjekët insistojnë gjithashtu se kalendari i ngjeshur nuk ndihmon aspak. Ligat kryesore europiane insistojnë të mbyllin kampionatet ndërsa UEFA nga ana e saj, ka priorite Champions dhe Europa League por të gjithë i bashkon një gjë…shpresa për t’u gjetur vaksina e Covid-19.
