Një 45-vjeçar ka rënë në prangat e policisë ditën e sotme në qytetin e Tiranës, pasi ka tentuar që të vriste me thikë kunatin.
Personat ishin duke u konfliktuar dhe në një moment shtetasi Roland Ruçi, ka goditur me thikë shtetasin A.B, i cili mësohet se është jashtë rrezikut për jetën.
Tentatori është arrestuar, pas një përpjekje për të ikur nga forcat e policisë, ndërsa mbi të rëndojnë akuzat për veprat penale “Dhuna në familje” dhe “Mbajtja pa leje e armëve të ftohta”.
Njoftimi i Policisë:
Tiranë
Parandalohet përshkallëzimi i mëtejshëm i një konflikti mes dy personave.
Vihet në pranga 45-vjeçari që tentoi të vriste me thikë kunatin e tij, i cili ndodhet jashtë rrezikut për jetën.
Shërbimet e Komisariatit të Policisë Nr. 2, pas njoftimit të marrë se në rrugën “Emin Duraku” kishte konflikt mes dy shtetasve, ku një prej tyre kishte goditur me thikë shtetasin tjetër, kanë shkuar menjëherë në adresën e dhënë.
Në momentin që shërbimet e Policisë janë afruar në vendin e ngjarjes, shtetasi R. R., 45 vjeç, është larguar me shpejtësi. Në ndjekje të tij janë vënë forca të shumta të Komisariatit të Policisë Nr. 2 dhe pas disa orë ndjekjeje dhe kontrollesh kanë bërë të mundur kapjen e tij.
Në përfundim të veprimeve u bë arrestimi i shtetasit R. R., pasi gjatë një konflikti për motive të dobëta goditi me thikë kunatin e tij shtetasi A. B.
Materialet i kaluan Prokurorisë, për veprime të mëtejshme, për veprat penale “Vrasje me dashje” e mbetur në tentativë, “Dhuna në familje” dhe “Mbajtja pa leje e armëve të ftohta”./Fjala.al/
