Dhia më e famshme në Gjermani, Hennes IX, nuk do të jetë e pranishme në ndeshjet në shtëpi të skuadrës së Këlnit, ndonëse nuk kishte munguar që prej 12 vitesh.
Ky vendim është marrë pasi në bazë të protokollit higjieno-sanitar të vendosur nga Bundesliga për të shmangur sadopak rrezikun e infektimit me koronavirus, kafshët nuk do të jenë të pranishme në stadium, raporton “Deutche Welle”.
Rikujtojmë se që prej vitit 2008 kjo do të jetë hera e parë që dhia e famshme nuk do të jetë prezente në një ndeshje shtëpiake të klubit gjerman.
Historia e maskotës së Këlnit i ka fillimet në vitin 1950, kur një cirk i dhuroi një dhi ekipit që në logon e tij ka pikërisht këtë kafshë si simbol. Ajo u pagëzua me emrin Hennes, në nder të Hennes Weisweiler, ish-lojtarit dhe trajnerit të famshëm të Këlnit.
Ndërsa deri ditën e sotme nëntë dhi kanë kryer detyrën e maskotës, për tifozët ajo kafshë është e shenjtë dhe është pagëzuar si “Mbreti i Qytetit”.
Në vitin 2015, kur sulmuesi nigerian i Këlnit, Antoni Ujah, vajti kapi nga brirët Hennesin duke festuar një gol, tifozët u nxehën aq keq saqë Ujah u detyrua të kërkonte ndjesë publikisht. Ndonëse kërkoi ndjesë për veprimin e tij në fund të sezonit Ujah mori valixhet dhe kaloi te Verder Bremen/Fjala.al/
