Industria e turizmit është një nga industritë më të goditura nga pandemia e koronavirusit. Të gjendur në këtë situatë Komisioni Evropian ka deklaruar se do të propozojë hapje graduale të kufijve të BE-së.
Kufijtë e BE-së janë mbyllur që në muajin mars në përpjekje për të frenuar përhapjen e virusit.
“Mesazh i yni është se ne do të kemi sezon turistik këtë verë, qoftë me kufizime apo me masa të sigurisë”, tha komisionari për Ekonomi i BE-së, Paolo Gentiloni.
Duke folur në një intervistë për gjashtë gazeta evropiane, Gentiloni tha se industria e turizmit në Evropë përballet me një humbje prej 40% të aktivitetit të saj.
Shtetet veç e veç kanë nisur të rihapin kufijtë.
Austria dhe Gjermania janë dy vendet e fundit të BE-së që janë pajtuar për heqjen e kufizimeve në udhëtim.
Nga 15 qershori do të rinisë lëvizja e lirë dhe nga e premtja do të ketë kontrolle në vendkalimet kufitare. “Duam t’ua lehtësojmë jetën e përditshme qytetarëve tanë dhe të ndërmarrim një hap tjetër drejt normalizimit”, tha kancelari austriak, Sebastian Kurz.
