Kryeministri i Shqipërisë, Edi Rama ka folur sërish për të ashtuquajturin Shengen Ballkanin apo mini-shengen, dhe objektivat që kërkohen të arrihen nëpërmjet kësaj nisme. Në një intervistë për televizionin kroat, Rama tha se qëllimi i kësaj nisme është thellimi i bashkëpunimit ekonomik dhe realizimi i katër lirive që ekzistojnë edhe brenda Bashkimit Evropian.
“Bashkëpunimi rajonal për ne është thelbësor. Ju, në Kroaci, jeni pjesë e BE – ne nuk jemi. Dhe derisa të jemi aty, nuk e shoh pse nuk mund të mund të lëviznim lirshëm brenda rajonit tonë. Të kesh lirinë e lëvizjes së njerëzve, të mallrave, të kapitalit të shërbimeve – që janë katër liritë e vetë BE-së. Shengen është përdorur si një pikë referimi, dhe i referohet këtyre katër lirive brenda Ballkanit Perëndimor”, ka deklaruar Rama.
Sipas Ramës, ndasitë që ekzistojnë në Ballkanin Perëndimor dhe veçanërisht midis Kosovë-Serbi nuk duhet të bllokojnë bashkëpunimin në rajon.
“Po ka shumë mosmarrëveshje midis Serbisë dhe Kosovës – por kjo nuk duhet të jetë pengesë për të bashkëpunuar. Dhe sa më shumë të bashkëpunojmë, aq më shumë flasim, aq më shumë njerëz njihen me njëri-tjetrin, më shumë në biznes, në shkëmbime njerëzore, shkëmbime kulturore dhe shumë gjëra të tjera, do të jetë më e lehtë për të kuptuar njëri-tjetrin dhe për të zgjidhur gjërat. Përndryshe, nëse presim të zgjidhim gjithçka para se të fillojmë bashkëpunimin, kurrë nuk do të jemi në gjendje as të bashkëpunojmë dhe as të zgjidhim gjithçka”, ka deklaruar kreu i qeverisë shqiptare.
