Drejtori sportiv i Lazios, Igli Tare ka theksuar se do të ishte një katastrofë nëse qeveria italiane nuk ndihmon futbollin dhe nëse anulohet Seria A.
Megjithëse Seria A ka caktuar një datë të përkohshme për rinisjen e kampionatit, Tare shprehet se kjo do ta ndërlikojë situatën. Ndërsa thekson se Gjermania ka protokollin më të mirë për të përfunduar sezonin.
“Ne do të përpiqemi të fitojmë kampionatin nëse Serie A rinis, nëse jo, do të përpiqemi përsëri vitin tjetër. Ata që thonë se nuk mund ta përfundojmë kampionatin vetëm për interesa personale nuk kanë kuptuar asgjë. Futbolli i jep jetesë 370 mijë njerëzve, nëse ndalet, do të jetë rënia e shumë njerëzve dhe Italia do të humbasë pjesë të historisë së saj, jo vetëm sportet. Do të jetë një fatkeqësi. Ndalimi tani do të thotë, pothuajse me siguri, që ne nuk mund të rifillojmë as në shtator. Shumë muaj pasivitet do të ishin të padurueshëm. Ata na kanë zili dhe mendojnë se futbolli është vetëm Serie A, përkundrazi ka mijëra njerëz dhe familje që punojnë. Ne kemi për detyrë t’i mbrojmë ata”, ka thënë Tare për La Repubblica.
