Deputeti Halil Jakimi, ka thënë sot se opozita që ndodhet në Parlament nuk është thjesht noter që vetëm të japë votën për ndryshimet që qeveria dhe opozita jashtëparlamentare i bëjnë Reformës Zgjedhore.
Jakimi ka folur nga Kuvendi, ku është shprehur se deputetët opozitar nuk do të votojnë, sipas tij asnjë produkt që bie ndesh me kërkesat e tyre.
“E kam parë dhe vërej se deri më tani Opozita jashtë Parlamentare bashkë me Partinë Socialiste kërkojnë të ndryshojnë një Reformë Zgjedhore, e cila kërkon vota për miratim në Parlament. Në shprehjet e tyre kemi dëgjuar të thonë se do e ndryshojmë dhe ju jeni thjesht noter. Unë dua ta theksoj këtu se personalisht, por edhe grupi im parlamentar demokrat besoj se nuk jemi noter, por deputet të këtij kuvendi. Prandaj merreni Reformën Zgjedhore si të mirëqenë dhe ne si të mirëqenë dhe votat tona në këtë parlament. Nuk do të votojmë asnjë produkt që bie ndesh me kërkesat tona dhe me ato që ne kemi shprehur për të pranuar këtë mandat deputeti.”-ka deklaruar deputeti.
Fjala e plotë e deputetit Halil Jakimi:
I nderuar kryetar i kuvendit, të nderuar kolegë deputetë!
Po dëgjoja dje deklaratat e këshillit politik. Më erdhi jashtëzakonisht keq si ky këshill bën mbledhje në hotele dhe resortet luksoze të Tiranës. E kam parë dhe vërej se deri më tani Opozita jashtë Parlamentare bashkë me Partinë Socialiste kërkojnë të ndryshojnë një Reformë Zgjedhore, e cila kërkon vota për miratim në Parlament. Në shprehjet e tyre kemi dëgjuar të thonë se do e ndryshojmë dhe ju jeni thjesht noter. Unë dua ta theksoj këtu se personalisht, por edhe grupi im parlamentar demokrat besoj se nuk jemi noter, por deputet të këtij kuvendi. Prandaj merreni Reformën Zgjedhore si të mirëqenë dhe ne si të mirëqenë dhe votat tona në këtë parlament. Nuk do të votojmë asnjë produkt që bie ndesh me kërkesat tona dhe me ato që ne kemi shprehur për të pranuar këtë mandat deputeti. Nuk foli askush për Reformën Zgjedhore. Madje përfaqësuesit nuk kishin marrë vesh as për depolitizimin e administratës. Opozita jashtë Parlamentare kërkon që të vazhdoje me veset e vjetra bashkë me Partinë Socialiste që të mos ndryshojnë sistemin dhe të mos pranoje as depolitizim të administratës. Sepse ju duket më mirë një komisioner partie sesa një mësues, noter, mjek infermier apo kushdo qoftë. Keni tre palë zgjedhje që ja fshihni përfaqësuesin popullit. Populli nuk po zgjedh, thjesht po voton. Listat e mbyllura i kanë vjedhur të drejtën e votës qytetarëve. Është shembulli më tipik rasti i Dibrës. Nuk kam asgjë personalisht me zotin Beqaj. Beqaj është deputet i qarkut Dibër. Deri më tani pas përfundimit të zgjedhjeve nuk besoj se ka qenë ndonjë herë në ndonjë fshat të Dibrës. Jam dakord me ndryshimet në lidhje me kodin zgjedhor. I mbështes të gjitha ndryshimet, por kushtëzoj votën time për me ndryshim sistemin zgjedhor. Jemi për lista të hapura. Jemi për të qëndruar deri në fund kauzës tonë për të cilën pranuam edhe mandatin që të mos votojmë asgjë pa ndryshim të sistemit zgjedhor. Prandaj kërkojmë marrjen parasysh të kërkesave tona dhe propozimeve tona si grup parlamentar. Edhe propozimin e 50 mijë firmave të qytetarëve shqiptarë për të diskutuar në tavolinë në lidhje me ndryshimin e sistemit zgjedhor./Fjala.al/
