Ndërkohë që në Tiranë po vendosen masivisht gjoba ndaj gazetarëve dhe deri te kryeopozitari Lulzim Basha për mos respektimin e distancimit fizik, në Tropojë ndodh krejt e kundërta. Në qytetin në veri të Shqipërisë janë zyrtarët e Policisë së Shtetit dhe institucioneve të tjera lokale që nuk respektojnë masat e përcaktuara në Tiranë.
Bashkia e Tropojës ka organizuar së fundmi një takim pune me kryepleqtë e fshatrave dhe drejtuesit e njësive administrative, por në sallën e mbyllur nuk është respektuar në asnjë moment distancimi fizik.
Në takim merrnin pjesë prefekti i Qarkut Kukës, Zenel Kuçana, drejtori i Policisë së Qarkut Kukës, shefi i Komisariatit të Tropojës dhe zyrtarë të tjerë lokal.
Njësoj ka vepruar në Tropojë tre ditë më parë edhe drejtori i Përgjithshëm i Emergjencave Civile, Haki Çako, i cili ka qenë edhe drejtor i Përgjithshëm i Policisë së Shtetit. Ai ka hyrë në zyrën e bashkisë së Tropojës i shoqëruar nga disa persona, ku dukshëm mungon distancimi fizik.
