Duke nisur nga sot, qytetarët mund të lëvizin lehtësisht, pa u dashur të marrin autorizim. Kjo vlen jo vetëm për këmbësorët, por edhe për automjetet.
Pra për të kaluar pragun e shtëpisë nuk do të ketë më nevojë që t’i drejtoheni portalit qeveritar për të marrë aprovimin dhe pikërisht ky lehtësim ka bërë që këtë mëngjes të hëne edhe rrugët të jenë të tejmbushura me këmbësorë dhe automjete.
Lajmi edhe në këtë rast u dha nga Kryeministri Rama. Përmes një postimi në rrjetet sociale, në orët e vona të pasdites së djeshme kreu i qeverisë prezantoi planin e ri të masave që kanë hyrë në fuqi prej kësaj të hëne.
Nëse për zonat e kuqe, fasha e lëvizjes është zgjatur nga 17:30 që ishte deri dje deri në 21;00, për zonat e gjelbra nuk do të ketë më kufizime. Qytetarët mund të dalin në çdo kohë, mjafton të respektojnë masat e distancimit social.
Nga ana tjetër, vazhdon të jetë e ndaluar hyrje-dalja e automjeteve në zonat e kuqe.
Këtë mëngjes të hëne kanë nisur aktivitetin e tyre edhe baret dhe restorantet pas një periudhe mbylljeje më shumë se dymujore.
Hapja e këtyre bareve do të jetë vetëm për pjesën e jashtme të tyre, pasi pjesa e brendshme nuk do të lejohet të funksionojë, në të kundër do të gjobiten.
Sa i takon dezinfektimit të ambienteve të bareve dhe restoranteve, ky proces parashikohet të kryhet 2 herë në ditë.
Gjithashtu nga ky 18 maji edhe maturantët i rikthehen bankave të shkollës pas rreth 3 muajsh mësim online nga shtëpia. Shkollat janë të përgatitura me sinjalistikën e duhur, dezinfektues, postera informuese dhe garantimin e distancës së tavolinave.
Për 3 javë maturantët do të rikthehen në shkolla për t’u përgatitur për provimet e maturës, nuk do të lejohen më shumë se 10-12 veta në klasë dhe se mbajtja e maskave do të jetë e detyrueshme.
