Policia e Shtetit ka zbuluar një rast të trafikut të farave të kanabisit nga Spanja drejt Shqipërisë, me anë të postës.
Operacioni në fjalë u kodua “Kostumi” dhe gjatë tij u sekuestruan 11 mijë fara kanabis sativa dhe u bë arrestimi i një të riu nga Vlora.
Nga hetimet e policisë në bashkëpunim me Drejtorisë së Përgjithshme të Doganave dhe Drejtorinë Vendore të Policisë Vlorë, u organizua dhe finalizua operacioni policor i koduar “Kostumi”.
Pas informacioneve të marra më datë 14 m,aj, u bë e mundur që në Degën Doganore Tiranë të konstatohej një pako postare me përmbajtje të dyshimtë, e ardhur nga Spanja, me destinacion qytetin e Vlorës.
Hetuesit referuan në Prokurorinë e Tiranës, për fillimin e ndjekjes penale, për veprën penale “Trafikim ndërkombëtar i lëndëve narkotike”.
Kështu ditën e shtunë, më 16 maj, në kuadër të dorëzimit të kontrolluar, në momentin e tërheqjes së pakos postare në qytetin e Vlorës, është bërë arrestimi në flagrancë i shtetasit me iniciale Olsi Caushaj, vjeç 30, lindur dhe banues në Vlorë.
Në përfundim u sekuestruan në cilësinë e provës materiale dy qese që përmbanin fara të bimës cannabis sativa, konkretisht 7000 fara të cilësisë së lartë për kultivim me llamba elektrike dhe 4000 fara për mbjellje në natyrë.
Nga ana e Drejtorisë Hetimore Qendrore, në bashkëpunim me Prokurorinë e Rrethit Gjyqësor Tiranë, vazhdon puna hetimore për zbulimin e autorëve te tjerë të përfshirë në këtë veprimtari kriminale.
