Ish futbollisti i kombëtares shqiptare Milot Rashica, tani një prej më të spikaturve në përfaqësuesen e kosovës, është bërë baba për herë të parë. Në një kohë që shumë klube të njohura europiane e joshin për të firmosur këtë verë, e kur Bundesliga sapo ngrohu motorët, lojtari shqiptar shënon në…maternitet.
Në krah të gruas së tij, Belkizit dhe djalit të sapolindur, Miloti tregoi jo pa krenari “golin” e jetës. Lindja e djalit të mesfushorit, anëtari më i ri i dinastisë rashica, vjen pak orë pas humbjes së skuadrës së tij Werder Bremen në Bundesliga.
Milot Rashica cilësohet një xhevahir në qytetin e Bremen dhe ai po kërkohet me ngulm edhe nga Liverpool(fjala.al). 23 vjeçari nga Vushtria ishte më i miri në gjysmën e parë të sezonit me shtatë gola dhe tre asiste për Werder.
Trajneri i Liverpool, Jürgen Klopp e do Rashicën në verë dhe për këtë klubi anglez e ka ndjekur disa herë nga afër dhe fituesi i Ligës së Kampionëve është gati për një ofertë serioze, plot 38 milionë Euro. Ky çmim do të thyente çdo rekord të shitjes në klub, limiti që e vendosi Diego kur kaloi te Juve për 24.5 milionë euro.
