Deri në pushimin e ligës, trajneri i Real Madrid ishte ai që bëri ndryshimet më të pakta, duke u dhënë në këtë mënyrë zëvendësuesve më pak minuta në fushë.
Nëse La Liga rifillon, kampionati do të bëhet një “tour de force” (përballje e më të fortëve), i vërtetë që do t’i detyrojë lojtarët të bëjnë përpjekje intensive me pak kohë rikuperimi dhe në një hapësirë shumë të shkurtër kohe për të përfunduar garën. Madje, edhe në temperatura shumë më të larta sesa ato që janë mësuar.
Kjo do të përfshijë shumë punë nga trajnerët, të cilët në disa raste, siç është ai i Real Madridit, do të detyrohen të bëjnë ndryshime të rëndësishme. Rasti i Zinedine Zidane, i cili është trajneri i La Liga që deri në çastin e pezullimit të kampionatit u dha më pak kohë zëvendësuesve të tij, mund të merret dhe si shembulli perfekt. Ai është trajneri që ka bërë ndryshimet më të pakta (mesatarisht 2.81) dhe që ka dhënë më pak minuta për zëvendësuesit.
Francezi ishte trajneri që në të shumtën e rasteve ka mbyllur një lojë pa ezauruar zëvendësuesit. Kujtojmë që tani, pas modifikimit të pranuar nga Federata Spanjolle e Futbollit, do të jetë e mundur të bëhen deri në pesë zëvendësime për ndeshje.
Në skajin tjetër të listës janë gjashtë skuadra që kishin shterur në çdo ndeshje tri ndryshimet, si Granada, Alaves, Betis, Getafe, Mallorca dhe Seville.
Zëvendësuesit madrilenë, përveç kësaj, janë ata që kanë kaluar minutat më të pakta në fushë: gjithsej 1.299, “Zizou” i bën disa ndryshime vetëm në bazë të lojës që është duke u zhvilluar.
Sipas mesatares së minutave, një zëvendësues nga Real Madrid është në fushë në 17.09 minuta, ndërsa ata nga Granada shijojnë 25.21 minuta lojë.
Nga ana tjetër, në Champions League, Zidane i ka përdorur të tria ndryshimet në të gjitha ndeshjet (gjashtë në fazën e grupeve dhe një që korrespondon me ndeshjen e parë të raundit të 16-të) që ai ka luajtur në kampionatin kryesor kontinental këtë vit.k.t/Fjala.al/
