As 1 javë nuk zgjati pezullimi i pjesëmarrjes së opozitës jashtëparlamentare në tryezën e Këshillit Politik. Kryeopozitari Lulzim Basha vendosi për pezullimin të dielën e kaluar, kur bashkia e Tiranës shembi godinën e Teatrit Kombëtar, por pas negociimit të ambasadorëve, PD dhe LSI do rikthehen sërish në tryezë.
Oerd Bylykbashi dhe Petrit Vasili i janë drejtuar me një letër Damian Gjiknurit dhe Rudina Hajdarit, ku kërkojnë mbledhjen e Këshillit të hënën e 25 majit.
“Rifillimi i procesit më 11 maj është goditur vazhdimisht nga deklarata dhe veprime që kanë shkaktuar krizë politike e që, qartazi, kanë patur si qëllim shkatërrimin e këtij procesi jetik politik. Por, pavarësisht këtyre veprimeve të qëllimshme, Opozita e Bashkuar nuk do të heqë dorë nga objektivi i saj për të përmbushur pa vonesë obligimin e saj para shqiptarëve për zgjedhje demokratike”, thuhet në letër.
Përfaqësuesit e opozitës jashtëparlamentare mohojnë se palët kanë arritur dakordësi për shumë çështje themelore.
“Deklarimet tuaja se është gjetur kompromisi për një sërë çështjesh janë të pavërteta dhe synojnë vetëm fshehjen e të vërtetës që deri më sot nuk ka kompromis për çështjet themelore, për të cilat Opozita e Bashkuar ka paraqitur propozime konkrete”, shkruajnë Bylykbashi dhe Vasili.
Dje ishte ambasadorja amerikane, Yuri Kim që vlerësoi lidershipin e Bashës për t’u rikthyer në tryezën e bisedimeve.
-Opozita i kërkoi të hënën për ‘Zgjedhoren’, PS: Është Bajram, mblidhemi të martën
