Mbledhja e Këshillit Politik për reformën zgjedhore ishte parashikuar të niste në orën 17:00, por është shtyrë në moment të fundit. Arsye për këtë shtyrje nuk është dhënë, por është bërë me dije se mbledhja do të zhvillohet në orën 19:00.
Sot është dita e fundit për arritjen me konsensus të marrëveshjes për reformën zgjedhore. Palët kanë ende disa ndasi sa i përket përdorimit të teknologjisë në zgjedhje apo emërimit të një drejtori të ri të Policisë së Shtetit gjatë fushatës zgjedhore.
Këto ndarje janë midis mazhorancës dhe opozitës jashtëparlamentare, ndërkohë që opozita parlamentare e përfaqësuar nga Rudina Hajdari, kërkon vazhdimisht hapjen e listave të kandidatëve për deputetë dhe ndryshimit të sistemit zgjedhor. Kjo kërkesë e Hajdarit nuk po merret parasysh nga PS, PD dhe LSI.
Gjithsesi, edhe nëse sot, më 31 maj, nuk arrihet një marrëveshje përfundimtare, realizimi i reformës zgjedhore nuk mund të konsiderohet i dështuar. Afati i fundit për të përmbyllur Kodin e ri Zgjedhor është 30 qershori dhe kjo kohë mund të përdoret për negociata midis palëve, gjithnjë nëse sot nuk arrihet marrëveshja.
Në rast se asnjë dakordësi nuk arrihet përgjatë kësaj kohe, mazhoranca socialiste është zotuar për ta miratuar e vetme në Parlament reformën zgjedhore, bazuar në rekomandimet e OSBE/ODIHR.
