Përdhunuan të miturën 15 vjeçare në Babrru, Prokurori Armand Gurkuqi pritet që të kërkojë masën e sigurisë “arrest me burg” për 65-vjeçarin Abaz Dokun, ish rojen e shkollës dhe tre të rinjtë.
Masa ndaj tyre do të zhvillohet ditën e nesërme në Gjykatën Penale Tiranë.
Policia dhe Prokuroria u vunë në lëvizje nga kallëzimi i familjarëve të vajzës pasi në rrjetet sociale personat e përfshirë në këtë ngjarje të rëndë hodhën videon e përdhunimit.
Në dëshminë përpara Oficerëve të Policisë Gjyqësore i moshuari ka mohuar të ketë kryer marrëdhënie seksuale me të miturën, por ka pranuar se e ka prekur atë në vende intime.
Kujtojmë se Abaz Doku, është 65-vjeçari i cili akuzohet se ka përdhunuar një vajzë të mitur në zonën e Babrrusë në Tiranë.
Policia e Tiranës ka pasur prej kohësh informacione se Abaz Doku abuzonte me të mitur, madje është shoqëruar disa herë në komisariat, por kanë munguar provat. Ndërsa vetëm ditët e fundit është arritur të sigurohen prova rreth ngjarjes dhe të arrestohej.
I pari që ka abuzuar seksualisht ka qenë i moshuari, i cili e përndiqte për një kohë të gjatë duke i thënë se do t’i shkruante ne muret e shkollës emrin e saj dhe fjalë ofenduese për të, në rast se ajo nuk kryente marrëdhënie seksuale me të moshuarin.
Ai e ka filmuar dhe më pas ka vijuar shantazhi dhe më pas abuzimi seksual nga tre nxënës të tjerë të shkollës ku studionte vajza.
Të 4 abuzuesit përfunduan në pranga, për veprat penale “Marrëdhënie seksuale ose homoseksuale me të mitur”, ”Marrëdhënie seksuale ose homoseksuale me dhunë me të mitur të moshës 14 deri në 18 vjeç”, “Shtytja e të miturëve në krim” dhe “Vepra të turpshme”, të gjitha kryer në bashkëpunim./ b.b/fjala.al
