Vjosa Osmani është gruaja më e votuar në Kosovë dhe pas Albin Kurtit që në zgjedhjet parlamentare të 2019-ës mblodhi 183 mijë e 868 vota, deputetja e Lidhjes Demokratike u votua nga 176 mijë e 188 qytetarë. Për të gjetur deputetin e dytë më të votuar të LDK-së duhet të zbresësh poshtë në listë, ku renditet Kujtim Shala me 39 mijë e 091 vota.
E megjithë këtë mbështetje që siguron te elektorati kosovar, kryetarja aktuale e Parlamentit rrezikon të mbetet pa poste me formimin e qeverisë së re.
Vjosa Osmani u zgjodh në krye të Parlamentit me marrëveshjen e arritur midis LDK-së dhe Lëvizjes Vetëvendosje dhe ndryshe nga kolegët e saj në parti, ajo refuzoi të votojë për rrëzimin e Qeverisë së Albin Kurtit.
Osmani ka mbajtur qëndrime kritike për udhëheqjen e LDK-së sa i përket konfliktit me LVV dhe bashkëpunimin që pritet të nisë me AAK-në e Ramush Haradinajt.
Sot në Kryesinë e LDK-së do të diskutohen emrat e ministrave për qeverinë e re, e cila pritet të votohet në Kuvend këtë javë, sapo të publikohet aktgjykimi i plotë i Gjykatës Kushtetuese. Kjo gjykatë u shpreh se dekreti i presidentit Hashim Thaçi për t’i dhënë mandatin e kryeministrit kandidatit të LDK-së, Avdullah Hoti, është në përputhje me Kushtetutën.
Mediat në Kosovë janë duke publikuar edhe emrat e mundshëm nga LDK që do të mbajnë poste ministrore në qeveri, ndërkohë aty mungon emri i Vjosa Osmanit. Nuk dihet nëse Osmani do të vazhdojë të qëndrojë në krye të Kuvendit, por sinjalet që vijnë nga LDK nuk e favorizojnë këtë vendim.
Drejtues të LDK-së kanë mohuar se ndaj Vjosa Osmanit do të merret ndonjë masë përjashtuese, gjithsesi, ata i kanë konsideruar jo normale qëndrimet e saj kundër vendimeve të kryesisë së partisë./s.k-Fjala.al
Emrat e mundshëm për ministra nga LDK
Driton Selmanaj -Zëvendëskryeministër,
Hykmete Bajrami -Ministre e Financave,
Vlora Dumoshi -Ministre e Kulturës,
Agim Veliu -Ministër i Punëve të Brendshme,
Arban Abrashi -Ministër i Infrastrukturës dhe Ambientit,
Armend Zemaj -Ministër i Bujqësisë,
Besian Mustafa -Ministër i Integrimeve Evropiane,
Anton Quni -Ministër i Mbrojtjes
Emrat e propozuar për ministra nga AAK
Besnik Tahiri -Zëvendëskryeministër,
Meliza Haradinaj -Ministre e Punëve të Jashtme,
Selim Selimi -Ministër i Drejtësisë,
Blerim Kuqi -Ministër i Zhvillimit Ekonomik,
Ramë Lika -Ministër i Arsimit
