Ardi Veliu nuk do të shkarkohet nga posti i drejtorit të Përgjithshëm të Policisë së Shtetit, pavarësisht skandalin ku u përfshi pak ditë më parë, me publikimin e videos së mamasë së një djali të dhunuar nga efektivët.
Lajmi u konfirmua nga kryeministri Edi Rama gjatë komunikimit me gazetarët. Duke theksuar disa herë se Veliu gaboi me publikimin e videos, Rama shtoi se mirëpret ndjesën e kërkuar nga numri 1 i Policisë së Shtetit. Rama tha se e vlerëson Ardi Veliun për integritetin dhe profesionalizimin, ndaj kjo çështje për të është e mbyllur.
“Së pari, më lejoni ta sqaroj se Drejtori i Përgjithshëm i Policisë, për të cilin kam konsideratat më larta, në këtë rast ka gabuar, pa diskutim. Ka gabuar, e them pa asnjë rezervë. Por jam më i prirur t’i besoj ndjesës së tij publike dhe sqarimit që dha, sesa moralistëve të këtij vendi. Është fare e qartë që nuk ishte një përpjekje për të justifikuar dhunën sepse punonjësi i policisë për të cilin flitet është pezulluar menjëherë dhe është çuar në hetim penal, por ishte një përpjekje e keq-shpjeguar për të thënë: dakord për të gjitha, por edhe familja ka rolin e vet në rritjen e brezit të ri. E thënë ashtu ishte gabim, por preferoj ndjesën publike të tij dhe shpjegimet e dhëna prej tij. Duke e njohur për shkak të punës dhe duke e vlerësuar për integritetin moral të pa vënë në diskutim nga askush, çështja për mua është e mbyllur”, u shpreh Rama.
Vijon…
