Në seancën e sotme online të Komisioni për Çështjet Ligjore, Administratën Publike dhe të Drejtat e Njeriut, në drejtimin e kryetarit të komisionit, z. Ulsi Manja, u zhvilluan dy seanca dëgjimore, njëra prej të cilave ishte vazhdimi i seancës së mëparshme me Kryetaren e Komisionit të Prokurimit Publik, Evis Shurdha, për raportimin e veprimtarisë vjetore për vitin 2019.
Ky i fundit iu përgjigj pyetjeve të drejtuara nga deputetët lidhur me veprimtarinë e këtij institucioni, kryesisht me çështjet e ankimuara të KPP në Gjykatë dhe problematikën e vakancave në strukturën e institucionit.
Ndërkohë mbledhja vijoi me një seancë dëgjimore me Avokatin e Popullit, Erinda Ballanca, për raportimin e veprimtarisë vjetore për vitin 2019.
Ballanca u ndal në disa çështje që shqetësonin institucionin, të cilat lidheshin me kapacitetet e kufizuara buxhetore dhe njerëzore.
Shqetësimi kryesor sipas Ballancës, mbetet mungesa e cilësisë efektive të respektimit të të drejtave dhe lirive themelore të njeriut.
Më pas Avokati i Popullit iu përgjigj pyetjeve të deputetëve lidhur me uljen e numrit të ankesave tek Avokati i Popullit, zbatimit të marrëveshjes së FRONTEX, rolit të Policisë së Shtetit përgjatë zhvillimit të protestave, veprimtarisë së situatës së respektimit të të drejtave të njeriut nga administrata publike.
Sakaq deputetja e PS Vasilika Hysi gjatë fjalës së saj parashtroi disa problematika të hasura në raport, si dhe vlerësoi se nga 6 rekomandime të lëna nga Kuvendi në Rezolutën e vitit të kaluar, nga ana e Avokatit të Popullit janë plotësuar 4 prej tyre dhe 2 janë në proces. Rekomandimet ende të parealizuara lidhen me ndjekjen sistematike të zbatimit të rekomandimeve që jep për institucionet e tjera dhe bashkëpunimin me Kuvendin e Shqipërisë, si dhe bashkëpunimin e Avokatit të Popullit me organizatat homologe.
gj.b/fjala.al
