Sulmuesi i kombëtares shqiptare Armando Sadiku ka zgjatur edhe dy muaj marrëveshjen e huazimit me skuadrën e Malaga në kampionatin spanjoll të futbollit, një sinjal i qartë se formacioni iberik ka nevojë ende për lojtarin kuqezi pavarësisht situatës së vështirë të pandemisë dhe krizës financiare.
Futbollisti shqiptar është i huazuar nga Levante te skuadra e kategorisë së dytë ku po luan shumë mirë. Sulmuesi nga Cërriku e kishte kontratën paraprake deri më 30 qershorin e 2020 por kur duhen edhe thuajse 3 javë nga skadenca, puna e mirë e menaxherit dhe mirëkuptimi i drejtuesve, kanë gjuhën e përbashkët me Malaga, për të zgjatur bashkëpunimin.
Armando Sadiku kështu do të mbetet me klubin e ligës së dytë deri sa të mbyllet kampionati. Sadiku është golashënuesi i skuadrës së tij, ndërsa e ardhmja duket larg Malaga. Ekipi që po luan tani nuk ka mundësi ekonomike që të paguajë kartonin e shqiptarit përfundimisht, por mediat iberike thonë se në rast paraqitjesh të mira, huazimi mund të shtyhet 1 sezon.
