Deputeti i opozitës parlamentare Kostaq Papa u largua sot nga grupi demokrat, pasi kërkoi dorëheqjen e nënkryetares së Kuvendit Vasilika Hysit.
Nga salla e Parlamentit, Papa ka akuzuar Hysin për censurim të fjalës së tij në të paktën 3 raste dhe akuzoi më tej grupimin demokrat për pseudodemokraci dhe sipas tij këta persona për përfitime personale duan të veshin veprimet jo korrekte të shtetit me fasadë.
“E lëshoj grupin parlamentar dhe jap dorëheqje prej tij duke i lënë paudhësitë politike, duke i falënderuar për bashkëpunimin po i lë në pseudodemokracinë e tyre që paraqesin të fshehur realitetin. Nuk kam ndërmend të merrem me asnjërin realisht as me prezantime fiasko papagalli por me fenomene politike dhe fshehjen që duan t’i bëjnë demokracisë dhe fasadës që duan të veshin veprimet jo korrekte të shtetit për përfitime personale, më falni për fjalën për b*thëlëpirje”, -tha deputeti.
Ndërsa gjatë përgjigjes së tij kreu i Kuvendit Gramoz Ruci, tha se është e drejta e Papës të ankohet sipas legjislacionit dhe të zgjedhë të hyjë apo të dalë nga një grup.
“Lidhur me atë që thatë për nënkryetaren nuk ndaj të njëjtin mendim, por është e drejta jote nëse ke vërejtje për mua apo zëvendësen, rregullorja është e qartë drejtoju institucioneve të parlamentit të marrin masa nëse e shohin të arsyeshme. Sa për ikjen nga grupi është e drejta juaj ku të futeni ku të dilni”, -u shpreh Ruçi.k.t/Fjala.al/
