Firmosja e një marrëveshjeje politike për reformën zgjedhore, ku kërkoi shumë, por mori pak, duket se është hedhur pas krahëve nga opozita. Ajo ka marrë dje vendim për t’iu rikthyer takimeve me elektoratin dhe demokratizimit të brendshëm të partisë.
Çfarë kërkoi dhe çfarë mori në tryezën e gjatë politike opozita dhe si erdhi vendimi politik për të nisur një fushatë të hershme zgjedhore?
Çfarë do të thotë identifikimi biometrik dhe a i ofron kodi i ri garacitë për procesin zgjedhor? Analizon për gazetën “Fjala” eksperti i zgjedhjeve, Premto Gogo.
Nga Blerina Gjoka
Dy ditë pas firmosjes së marrëveshjes politike me mazhorancën për reformën zgjedhore, Partia Demokratike, partia më e madhe e opozitës, nis sfidën elektorale me veten dhe popullin. Energjia e shpenzuar në tryezën e Këshillit Politik në 6 muajt e fundit iu shpërblye vetëm përgjysmë, pasi nuk arriti të merrte në tryezë të gjitha garancitë që kërkonte për lirinë dhe ndershmërinë e zgjedhjeve. Ajo hoqi dorë nga kushti kryesor, ajo e një qeverie tranzitore, 100 ditë para zgjedhjeve, duke u mjaftuar me identifikimin biometrik të zgjedhësve dhe ruajtjen e formulës aktuale të përbërjes së komisioneve zgjedhore, si garanci gjysmake për procesin e votimit dhe numërimit, por jo të problemit kryesor të zgjedhjeve, atë të shit-blerjes së votës. Pasi e gjuajti topin që iu la në fushë nga trojka e ambasadorëve, (SHBA, BE, Britania e Madhe), opozita ka vendosur ta kanalizojë energjinë e saj në një fushë të re, më të madhe , me elektoratin e saj. Tashmë loja e saj e vërtetë mbetet ajo me zgjedhësit.
Loja në fushë të madhe
Dy vendime të rëndësishme u morën në mbledhjen e djeshme të kryesisë së Partisë Demokratike; fushatë zgjedhore brenda partisë për të zgjedhur kandidatët për zgjedhjet e ardhshme dhe ndezje e motorëve për zgjedhjet parlamentare të vitit 2021, në takime me elektoratin për të prezantuar platformën ekonomike të rimëkëmbjes së vendit.
“Gati për të fituar zgjedhjet”, – u shpreh kreu i kësaj partie, Lulzim Basha, pas kësaj mbledhjeje duke dhënë mesazhin se opozita tashmë topin do ta luajë tjetërkund, jo në fushën e ngushtë të një tryeze politike, por në fushën e vërtetë politike, atë të njerëzve. “Sfida më e madhe e çdo familjeje, sfida e madhe e çdo shqiptari sot është kriza ekonomike.
Dhe kjo sfidë nuk mund të zgjidhet nga ata që e shkaktuan këtë krizë të thellë ekonomike duke e varfëruar, zhvatur dhe taksuar Shqipërinë në këto 7 vite. Ndaj e gjithë vëmendja jonë, i gjithë fokusi ynë, i gjithë përqendrimi ynë tani është tek e ardhmja. Është te një ekonomi e fortë dhe një Shqipëri e fortë.” – tha ai.
Basha paralajmëroi se PD-ja dhe Opozita e Bashkuar do të paraqesin platformën ekonomike, ta konsultojë atë kudo nëpër Shqipëri. “Ne do t’i fitojmë zgjedhjet së bashku me shqiptarët, do t’i kthejmë qeverisjen vendit dhe do të kemi në fokusin tonë ringritjen ekonomike dhe ndërtimin e një ekonomie të fortë për shqiptarët, që të prodhojë mirëqenie dhe vende pune.” – theksoi Basha. Sipas tij, komunikimi me njerëzit do të jetë nga tani e tutje përqendrimi i të gjitha energjive opozitare.
”Nuk do të humbasim asnjë sekondë me gropat dhe kurthet e një qeverie të dështuar në largim, por do ta përqendrojmë të gjithë energjinë tonë, të Partisë Demokratike, të aleatëve tanë, të Opozitës së Bashkuar, te fitorja e zgjedhjeve të ardhshme dhe zgjidhja e krizës së rëndë ekonomike, duke ofruar planin tonë, masat tona shqiptarëve dhe duke ndërtuar bashkë me shqiptarët rrugën e daljes nga kjo krizë, për t’ua kthyer ekonominë dhe Shqipërinë, shqiptarëve”, – u shpreh Basha.
Në kuadër të kësaj hapjeje të opozitës drejt elektoratit, selia blu ka vendosur të rinisë dhe demokratizimin e partisë, duke premtuar zgjedhje me parimin “një anëtar, një votë”, një premtim ky i pambajtur i Bashës në zgjedhjet e fundit të 2017-s, kur listat e kandidatëve u hartuan prej tij, pa e kaluar filtrin e partisë.
Ai bëri të ditur se “Kryesia e PD-së vendosi të fillojë procesi i përzgjedhjes, konsultimit dhe seleksionimit të kandidaturave për zgjedhjet parlamentare dhe vendore, sipas parimit të konsultimit aktiv me anëtarët e PDSH-së, sipas parimit statutor “një anëtar, një votë””.
Shije e hidhur nga marrëveshja
Arritja e një pakti politik me mazhorancën nuk ka sjellë asnjë gëzim në kampin opozitar, në një kohë kur ajo ndodhet jashtë Kuvendit dhe e papërfaqësuar në pushtetin lokal, si pasojë e vendimmarrjes politike një vit më parë, pikërisht me akuzën se zgjedhjet e fundit parlamentare ishin të blera dhe ilegjitime.
Pas 6 muajsh negociata ku ishte futur duke kërkuar gjithçka, ose asgjë, opozita u mjaftua me 2-3 arnime të kodit zgjedhor, çështje teknike që nuk prekin thelbin e tij. Zhgënjimi në kampin opozitar preku dhe themeluesin e ish-kryetarin historik të PD-së, Sali Berishën, sipas të cilit kjo ishte një arritje gjysmake dhe nuk adreson çështjet madhore të dy zgjedhjeve të fundit, siç janë ndërhyrja e shtetit në zgjedhje, mediat dhe kontrolli i tyre direkt nga qeveria, apo çështja e listave të votuesve.
Po ashtu, opozita zhgënjeu jo pak disa aktorë të tjerë të shoqërisë civile dhe vetë aleatët e saj të vegjël, që po kërkonin me ngulm lista të hapura të kandidatëve dhe një sistem të ri zgjedhor, si garanci e një përfaqësimi më demokratik në zgjedhje.
Basha takim me biznesin e vogël: Ndihma e qeverisë, e pamjaftueshme
Menaxhimi i situatës së epidemisë së koronavirusit është kthyer në një kauzë politike të opozitës, e cila akuzon qeverinë se nuk i ka mbështetur mjaftueshëm bizneset e vogla. Kryetari i Partisë Demokratike, Lulzim Basha, ka zhvilluar dje takime me disa pronarë të bizneseve të vogla në Tiranë, të cilët i pohuan atij vështirësitë ekonomike në të cilat ndodhen pas izolimit 2-mujor.
Sipas bizneseve, ka një rënie drastike të konsumit dhe u ka munguar mbështetja nga qeveria. “Disave u dhanë mbështetje, disave jo. Kërkova lekë borxh për të mos hequr njerëzit nga puna”, – u shpreh pronarja e një lokali. “Xhiroja ka rënë shumë, kam pasur 4 punëtorë, por 2 i hoqa, me keqardhje.” – u shpreh pronari i një lokali në qendër të Tiranës.
“E kisha të mbyllur dyqanin 2 muaj, por fatura e dritave më erdhi aforfe 50 mijë lekë, pa e hapur asnjë ditë”. – tha një tregtar. Ndërsa në tjetër që kishte pagesën 400 mijë lekë për 3 muaj tha se vetëm qiranë mujore e ka 700 mijë lekë.
“Nuk e di, jam e falimentuar. Kam një vit që jap qira kot.” – u shpreh e dëshpëruar një zonjë, e cila mori një premtim nga kreu i opozitës. “Mos u dorëzo, së shpejti do ta ndryshojmë. Lekët e taksave që paguani, do t’i merrni mbrapsht ju, jo oligarkët”, – vijoi ai.
Kryedemokrati theksoi rëndësinë që ka për ekonominë mbështetja e duhur për bizneset. “Të gjitha shtetet, edhe Kosova, po i vazhdon subvencionet ndaj biznesit, përndryshe do të zhytet gjithçka. Po u zhytët ju, u zhyt punësimi, u zhyt konsumi, pastaj ekonomia futet në një cikël që nuk e merr dot veten.
Do të vazhdojmë të jemi zëri juaj dhe, së shpejti, edhe mbështetja juaj. Duhet patjetër të keni ndihmë nga shteti.
Qoftë me anulimin e taksave, qoftë me mbështetjen për pagat. Këtë po bëjnë të gjithë. Ato lekë që kemi, duhet t’i çojmë në mbështetje të biznesit.” – u tha Basha pronarëve të bizneseve të vogla.
l.m/Fjala.al
