Ardian Çapja ka dalë nga spitali vetëm 3 ditë pas atentatit dhe mësohet se gjendja e tij është përmirësuar, pas qëndrimit prej disa orësh në një operacion në spitalin e Traumës.
Çapja u plagos paraditen e së hënës në zonën e Krastës në Elbasan dhe u tha se ky atentat u bë me snajper nga një distancë e madhe. Dyshimet janë se plumbi që plagosi Çapjan erdhi nga kodra përballë shtëpisë së tij ose nga brenda automjetit në pjesën e sediljes.
Ndërsa vetë Çapja ka dhënë dëshminë e tij një ditë pas plagosjes ku ka mohuar sërish që të jetë qëlluar me armë, ndërsa para grupit hetimor ka thënë se është rrëzuar në banesë dhe se në shpatull ka pasur një hekur dhe jo plumb.
“Nuk më vret njeri në shtëpinë time, u rrëzova dhe më ka hyrë një hekur në shpatulla”,-dëshmoi Çapja.
Rikujtojmë se familja e Çapjas tentoi që të fshehë ngjarjen dhe e paraqiti atë si incident të ndodhur në banesë.
Ndërsa faktet tregojnë se ngjarja ka qenë e planifikuar në detaje dhe se autorët dyshohet të kenë qenë profesionistë dhe të jenë paguar për atentatin, kjo për faktin se arma e përdorur si dhe largësia në të cilën është gjuajtur tregojnë se investimi për të hequr qafe Çapjan ka qenë shumë i madh.
Duhet theksuar se ky ishte atentati i tretë nga i cili Çapja shpëton me plagosje dhe së bashku me fisin e tij akuzohen për ngjarje të rënda të ndodhur në Elbasan.ka.ta/Fjala.al/
