Operacioni Forca e Ligjit kërkon që të deklarojnë burimin e pasurisë së tyre, dy persona në Tiranë dhe një në Vlorë.
Bëhet fjalë për tre persona me rekorde të theksuara kriminale, të dënuar më parë dhe konkretisht Orges Balla, Endrit Qyqja dhe Geno Lena.
Orges Balla, banues në Tiranë, rezulton i dënuar për veprën penale “Trafikim i lëndëve narkotike”.
Endrit Qyqja, banues në Tiranë, i dënuar për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.
Qyqja njihet si bashkëpunëtor dhe pjesë e grupit të Emiljano Shullazit. Endrit Qyqja dhe Endrit Zela, si pjesë e grupit të Emiljano Shullazit, i kanë vënë një gjobë prej 1 milion euro biznesmenit Ylvi Beqja.
Për Geno Lena, banues në Vlorë, Gjykata e Rrethit Gjyqësor Vlorë ka vendosur masën e sigurisë “Arrest në burg” në mungesë, për veprat penale “Vrasja në rrethana cilësuese”, e kryer në bashkëpunim, e mbetur në tentativë dhe “Armëmbajtja pa leje”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme./Ka.Ta/Fjala.al
