Futbollistët kanë pritur më shumë se dy muaj për t’u kthyer në fushë, pasi pandemia e koronavirusit imponoi një bllokadë si asnjëherë më parë, por ajo që parashikuan mjekët me dëmtimet fizike, duket se fatkeqësisht po merr jetë. Të kushtëzuar nga mungesa e futbollit dhe përgatitjes reale, shumë lojtarë po vuajnë problem të rënda… I fundit është shqiptari nga Kosova, Edon Zhegrova.
Futbollisti i përfaqësueses së Dardanëve do të mungojë disa javë, pas një dëmtimi që ka pësuar së fundmi në stërvitje me Basel. Praktikisht ai humbet finale e sezonit me gjigantët helvetikë. “Magjistari” i përfaqësueses së Kosovës zyrtarisht do të jetë jashtë për disa javë sipas mediave zvicerane.
Klubi, përmes një njoftimi në rrjetin social ‘Twitter’, ka njoftuar se 20-vjeçari ka dëmtuar ligamentet në kyçin e këmbës së majtë, por nuk ka treguar se sa do të mungojë, vetëm se “do të humbasë ndeshjet e radhës”. Lëndimi vjen për Edonin në momentin kur po e qartësonte të ardhmen, pasi huazimi nga Genk te Baseli i përfundon në fund të këtij edicioni. Raportohet se atë e duan disa klube në Serie A dhe Bundesliga.
