Pak për shkak të pritjes së madhe për futbollin real dhe atë të luftuar në kampionatin më të fortë të planetit e pak për shkak të rëndësisë së një ndeshjeje të tillë në kohërat e një pandemie, Manchester City-Arsenal i kaloi parashikimet. Fitorja komode e Manchester City kundër rivalëve londinezë në Etihad Stadium ishte ndeshja më e shikuar në Premier në tre vitet e fundit, në platformën Sky Sport.
Me tifozët e futbollit të ‘uritur’ për të parë ndeshje të Premierligës pas pezullimit gati tre mujor për shkak të COVID-19, supersfida mes Manchester City dhe Arsenalit ka arritur të tërheqë interesim shumë të madh. Në total, 2.6 milionë njerëz shikuan mbulimin e Sky Sports, me Raheem Sterling, Kevin de Bruyne dhe Phil Foden, që shënuan kundër Arsenalit, në fitoren 3:0 të Manchester City në shtëpi.
Kjo sfidë, për nivelet e shikushmërisë ka kaluar superndeshjen e vitit 2017, kur Manchester United barazoi 1:1 me Liverpool, ku shënuan Zlatan Ibrahimovic dhe James Milner. 1.1 milion shikues tërhoqi ndërkohë ndeshja mes Aston Villa dhe Sheffield United, që nuk regjistroi asnjë gol, por u pasurua me një episod kontrovers që i mohoi Blades fitoren.
