Teksa prezantoi kryenegociatorin e Shqipërisë për integrimin, Zef Mazi, Kryeministri Edi Rama u shpreh i gatshëm për tu takuar me Presidentin Ilir Meta. Kreu i qeverisë deklaroi se integrimi nuk është muhabet, por proces.
“A e kam ftuar Presidentin këto ditë? Jo, nuk kam pasur ndonjë orë për muhabet! Integrimi është një proces, hartë veprimi, ka ura ndërveprimi dhe në këtë drejtim, kemi qenë bashkë në tryezën e Këshillit të Integrimit dhe unë do të jem në çdo pikë ku është e nevojshme prania ime, Presidenti do të bëjë zgjedhjen e tij, përderisa ka qenë me siguri do të jetë përsëri.
Në këtë drejtim do ta shikoja këtë që kam shprehur si gatishmëri. Patjetër në çdo rast kur është e nevojshme për t’u ulur do të ulemi dhe kur Presidenti e ka të nevojshme për të komunikuar me mua”, u shpreh Rama.
Ai shtoi se mjafton që të mos jetë vendosja e një datë zgjedhjesh sipas një kushtetute imagjinare, dhe për çdo gjë tjetër është i gatshëm të ulet.
Lidhur me kohën se kur mund të zhvillohet konferenca e parë ndërqeveritare me Bashkimin Europian, deklaroi se janë ata që i vendosin./Bl.Ba/Fjala.al
