I dyshuari kryesor i goditjes me thikë që solli vdekjen e 25-vjeçarit nga Vlora ka rënë në prangat e policisë.
Në njoftimin e policisë bëhet me dije se është arrestuar 15-vjeçari me inicialet G.T, pasi qëlloi me thikë Aleksandër Petanajn, i cili ndërroi jetë në spital.
Ngjarja ka ndodhur pas një sherri që i mituri kishte me vëllanë e viktimës, 18 vjeç dhe mësohet se 25-vjeçari kishte ndërhyrë që të shuante sherrin, ndërsa ndodhi tragjedia.
Njoftimi i policisë:
Policia zbardh dhe dokumenton ngjarjen e ndodhur në orët e mbrëmjes së djeshme.
Më datë 18.06.2020, rreth orës 22:50, në Spitalin Rajonal Vlorë ka shkuar i dëmtuar nga një mjet prerës, shtetasi A. P., 25 vjeç, banues në Vlorë, i cili ka ndërruar jetë pak orë më vonë.
Menjëherë pas ngjarjes, Policia nisi hetimet për zbardhjen dhe dokumentimin e saj dhe falë veprimeve të shpejta, hetimore dhe profesionale u bë identifikimi në kohë rekord, kapja dhe prangosja e autorit, shtetasit G. T., 15 vjeç, banues në Vlorë.
Nga hetimet e kryera dyshohet se ngjarja ka ndodhur në lagjen “24 Maji” Vlorë, pranë vendit të quajtur “Ish-ushqimores”, ku pas një konflikti për motive të dobëta, shtetasi G. T. ka goditur me mjet prerës (thikë) shtetasin A. P., i cili ndërroi jetë rreth 4 orë më vonë në ambientet e spitalit.
Grupi hetimor po kryen veprimet e mëtejshme në lidhje me ngjarjen e ndodhur.ka.ta/Fjala.al/
