Përkujtesa e marrëdhënies historike midis Kosovës dhe vendeve të ish-Jugosllavisë dhe specifikisht Serbisë janë të rëndësishme, por po aq e rëndësishme në mos dhe më tepër është e ardhmja e këtyre marrëdhënieve.
Këshilli Shqiptaro-Amerikan me qendër në Nju Xhersi të SHBA i është drejtuar me një letër presidentit Donald Trump, në lidhje me takimin që do të mbahet më 27 qershor në Shtëpinë e Bardhë, ndërmjet presidentit të Serbisë, Aleksandar Vuçiç dhe presidentit të Kosovës, Hashim Thaçi.
“Ishim të shqetësuar se ka mbi 2-3 vjet që lobohet për ndarjen e Kosovës ose për shkëmbimin e territoreve siç e përshkruan presidenti Thaçi. U detyruam të çojmë një letër që të kemi një sqarim për shkak se na vinin disa sinjale jo të qarta nga Shtëpia e Bardhë, nga Serbia, nga Kosova, edhe deshëm që ta dimë se cili është qëllimi i këtij takimi.
Ky ishte shqetësimi i këshillit, por ashtu edhe i diasporës e popullit shqiptar që është në Shqipëri e Kosovë. Me anë të kësaj letre që dërguam, shfaqëm shqetësimet dhe kërkesat tona. Të mbash një takim në Uashington në Shtëpinë e Bardhë është një takim historik dhe shpresoj të njihet në favor të kombit shqiptar,”-u shpreh Haxhi Dauti, president i këshillit Shqiptaro-Amerikan.
Takimi në Washington me ndërmjetësimin e Presidentit Trump pritet të shënojë një pikë kthese pozitve për të gjitha palët, përfshirë edhe presidentin Trump, që aq shumë i duhet një sukses në arenën ndërkombëtare dhe pikërisht ky takim është një mundësi e rrallë.
Vetë autoritetet amerikane nëpërmjet të dërguarit Richard Grenell duket tepër të angazhuara për arritjen e një marrëveshjeje Prishtinë-Beograd, duke garanatuar mbështetje deri në njohjen e Kosovës./Fjala.al
