Ministri i Turizmit dhe Mjedisit, Blendi Klosi dhe Ministri i Sipërmarrjes, Eduard Shalsi zhvilluan ditën e sotme bashkëbisedim me hotelierët në Pogradec, mbi rregullat e plazheve, të cilat do të zbatohen në kushtet e pandemisë COVID 19.
Ministrat shkuan në qytetin liqenor, për shkak se Pogradeci ka çelur sot sezonin turistik dhe nga atje Klosi bëri një prezantim të gjithë lehtësirave fiskale në fushën e turizmit dhe foli mbi nevojën e krijimit të destinacioneve turistike.
“Në Shqipëri në bazë të kalkulimeve që ne kemi ka mbi 500-600 milionë investime në hoteleri, një punë e jashtëzakonshme, por tani këto investime duhen furnizuar me klientë e për këtë duhet te krijojmë destinacione turiatike dhe paketa turistike”-u shpreh Klosi.
Duke bërë një përmbledhje dhe shpjegim të politikave fiskale në drejtim të turizmit Klosi tha: “Në kuadër të reformimit të buxhetit për vitin 2020 dhe duke parë se çfarë do të ndodhë pas përfundimit të krizës së pandemisë, padyshim që promovimi i destinacioneve dhe logos së Shqipërisë do të jetë detyra e Ministrisë së Turizmit, por duhet të kemi dhe një komunitet të turizmit bashkëveprues”.
Ndërsa kryebashkiaku i Pogradecit, Ilir Xhakolli, më herët i njohu ata me disa nga investimet e kryera së fundmi siç është sheshi i trëndafilave, 10 stola të personalizuar me pjesë nga lirikat e Lasgush Poradecit dhe tregimet e Mitrush Kutelit dhe në qendër të këtij sheshi një shatërvan në formë libri me thënie të dy shkrimtarëve.
Dy ministrat u njohën edhe me rehabilitimin e plazheve, hapësirave publike për pushuesit dhe rikthimit të plazheve të vjetra si plazhi i “Huçkave”.ka.ta/Fjala.al/
