Një 32-vjeçar është arrestuar në kuadër të hetimeve për vrasjen e Hekuran Billës, në 11 qershor te “Komuna e Parisit”.
Në një lokal në Tiranë, policia thotë se një person sapo pa efektivët u largua me vrap, teksa në dorë mbante një çantë.
Pas ndjekjes nga policia, i riu me inicialet A. A., nga Shkodra, hodhi çantën në tokë, në të cilën mbante një pistoletë dhe një krehër me fishekë.
Policia thotë se operacioni u krye në kuadër të kapjes së personave që kanë dijeni apo janë bashkëpunëtorë të vrasjes.
Më herët, nga DVP Tiranë, u identifikua dhe u prangos 22-vjeçari S. M. (nipi i shtetasit V. M.), i dyshuar si bashkëpunëtor në vrasje.
Më pas, falë bashkëpunimit të shkëlqyer mes Policisë së Shtetit dhe Policisë malazeze, duke shkëmbyer në kohë reale informacione të grumbulluara nga DVP Tiranë, për vendndodhjen e shtetasit V. M., i dyshuar si autor kryesor për vrasjen e shtetasit H. B., u bë e mundur kapja në Malin e Zi, nga Policia malazeze, e shtetasit V. M. dhe më pas arrestimi i tij në pikën e kalimit kufitar Hani i Hotit, nga ana e strukturave të Policisë së Shtetit.
Sektori për Hetimin e Krimeve të Rënda ndaj Jetës dhe Pronës, në koordinim me Departamentin e Policisë Kriminale dhe nën drejtimin e Prokurorisë së Rrethit Gjyqësor Tiranë vijon veprimet për dokumentinin e plotë të vrasjes së shtetasit H. B., identifikimin, kapjen dhe arrestimin e personave të tjerë të implikuar në këtë ngjarje./Bl.Ba/Fjala.al
