Pas shumë emrave të njohur në futboll që kanë qenë pjesë e ekipeve të La Liga, edhe Carlo Ancelotti përfundoi në shënjestrën e autoriteteve tatimore spanjolle. Sipas mediave iberike, “Fiskalia” e Madridit ka paraqitur një ankesë kundër teknikut aktual të Everton për një evazion të pretenduar të kryer nga ai, mbi një milion Euro (për të qenë i saktë 1,062,079 Euro).
Autoritetet fiskale iberike insistojnë se evazioni është bërë në periudhën dy vjeçare 2014-2015, kur Ancelotti stërviti Realin. Akuzat janë mjaft të rënda dhe shqetësuese, dhe vijnë prej shmangies së taksave pjesërisht për kompensimin e marrë si trajner, por kryesisht dhe paratë që lidhen me të drejtat e imazhit.
Sipas hetuesve, Ancelotti kishte përdorur një rrjet kompleks ndërmarrjesh me zyra në parajsat fiskale jashtë Europës për të fshehur një pjesë të të ardhurave nga Agjensia Spanjolle e të Ardhurave. Tekniku italian nga Reggiolo është vetëm i fundit nga personazhet e njohur të futbollit iberik që përfunduan nën “lente” zmadhuese.
Rastet më të spikatura ishin natyrisht ato të Messi dhe Cristiano Ronaldo, të dënuara me 21 dhe 23 muaj burg përkatësisht dhe me pagimin e gjobave multimilionëshe. Sidoqoftë, lista është shumë e gjatë dhe përfshin José Mourinho, Radamel Falcao, Alexis Sanchez, Diego Costa, Javier Mascherano, Marcelo, Angel Di Maria, James Rodriguez, Mesut Ozil dhe shumë të tjerë. Në shumicën e rasteve, procedurat përfunduan me një pazar dhe pranim të fajësisë dhe pagimin e një pjese të parave që i detyroheshin.
