Në një ndeshje që intrigonte jo pak fatet e skuadrave italiane për kualifikimin në Europa League, Verona dështoi të japë përgjigjet e duhura. Fortesa në mbrojtje e përbërë nga dyshja shqiptare Kumbulla dhe Rrahmani, këtë radhë nuk i bëri dot ballë ofensivës së Napolit që fitoi 0-2.
Në duelin e shqiptarëve në dy ekipe të ndryshme, triumfuan vizitorët e Elseid Hysaj, me shkodranin që bëri një paraqitje të mirë dhe luajti për 67 minuta, para se t’i linte vendin Ghoulam. Armatës së trajnerit Gattuso që ngulmon për Champions League, i mjaftuan dy “pikante” nga goditjet e këndit, në fillim me Milik (38′), dhe më pas me zëvendësuesin Lozano (90′).
Verona mbeti pa pikë por ishte autore e një prove pozitive dhe mbetet zbulimi i këtij sezoni në Serie A.
