Kryeministri Edi Rama nga Kryeministria, në cilësinë e kreut të OSBE-së, zhvilloi Konferencën Vjetore të Sigurisë ku u shpreh optimist që prej momentit kur mori detyrën e rëndësishme por e shqetëson mungesa e vullnetit për përmirësim.
Në 6 muaj nga marrja e kryesisë nga Shqipëria të OSBE-së, shefi i qeverisë shqiptare ftoi vendet anëtare të kontribuojnë realisht për të siguruar që themelet e sigurisë së përbashkët të kësaj organizate të mos goditen.
“Më lejoni t’ju përshëndes të gjithëve nga Tirana, Shqipëria. Është kënaqësi e nder që të rishikojmë tablonë e sigurisë. U bënë 6 muaj në krye të OSBE, kaluam kufizimet dhe ndërlikimet e COVID-19 për të vijuar me aktivitet.
Është e qartë për mua se kemi nevojë për ndryshim. Megjithatë shoh një mungesë vullneti për të reflektuar seriozisht dhe për të përdorur imagjinatën. Kjo po prek themelet e sigurisë së përbashkët të organizatës sonë”, tha Rama.
Sipas shefit të qeverisë, duhet angazhim i përbashkët dhe është koha për ndryshim tani. “Pa repsektuar atë që kemi ndërmarrë bashkë e pa angazhim për të bashkëbiseduar s’mund të shpresojmë e jo më të presim të nxirret një Europë me stabël dhe më e sigurtë. Duhet të bëjmë përpjekje sa më të mirëfillta për të filluar të mendojmë ndryshe.
Le të jemi më kurajozë e të propozojmë e diskutojmë hapur, të përballemi hapur me njëri tjetrin për mënyrën si mund të punojmë për përmirësimin e gjërave, të ndërtojmë më shumë stabilitet dhe në mënyrë të hapur të të shikuarit gjërat përmes dialogut, si mund ta drejtojmë OSBE drejt rrugës për tu mëkëmbur”, u shpreh Rama./Bl.Ba/Fjala.al
