Ish-ministri i Brendshëm Saimir Tahiri është paraqitur paraditen e sotme te Krimet e Rënda ku pritej të njihej me vendimin, por që u shty për të premten.
Por ajo që ra në sy ishte fakti se pas daljes nga ambientet e Gjykatës, Tahiri para gazetarëve të cilët i kanë drejtuar disa pyetje teksa është përpjekur për t’u larguar këmbët i janë ngatërruar mes telave të mikrofonave dhe kamerave të pranishme.
Kjo duket se ka ardhur edhe si pasojë e shpërqendrimit që mund ta ketë shoqëruar sot gjatë seancës.
Momentet e sikletshme të Tahirit janë fiksuar në foto të cilat janë postuar në rrjetet sociale nga gazetarja e TVSH Flutura Tota.
Kujtojmë se Gjykata e Posaçme e Apelit shtyu sërish vendimin për ish-ministrin e Brendshëm Saimir Tahiri të parashikuar për t’u dhënë ditën e sotme.
Mësohet se seanca e radhës për t’u dhënë vendimi është lënë të premten e 26 qershorit në orën 13:00.
Shkak për shtyrjen e dhënies së vendimit është bërë gjyqtari i ri Dhimitër Lara, i cili zëvendësoi gjyqtaren Nure Dreni të shkarkuar nga procesi i vettingut. Mësohet se ai ka kërkuar më shumë kohë për t’u njohur me dosjen “Tahiri”./Bl.Ba/Fjala.al
